"Azərbaycan xalqı bütün çətin məqamlarda ölkə rəhbərinin böyük dəstəyini görüb, hiss edib"

Day.Az представляет новость на азербайджанском языке

Azərbaycan xalqı bütün çətin məqamlarda ölkə rəhbərinin böyük dəstəyini görüb, hiss edib, onun ətrafında daha sıx birləşərək xalqla iqtidar birliyinin sarsılmaz olduğunu nümayiş etdirib. Bu birlik və dəstək ölkə vətəndaşlarının Azərbaycan Prezidentinə ünvanladıqları saysız-hesabsız minnətdarlıq məktublarında öz əksini tapıb.

Day.Az AZƏRTAC-a istinadən bildirir ki, bu fikirlər Prezident Administrasiyasının Sənədlərlə və vətəndaşların müraciətləri ilə iş şöbəsinin müdiri Süleyman İsmayılovun "Azərbaycan Prezidenti vətəndaşların müraciətlərinə daimi diqqət və qayğını prioritet məsələ hesab edir" adlı təhlili məqaləsində yer alıb.

"Məktublarda tez-tez vurğulanan fikirlərdən biri də ondan ibarətdir ki, ümummilli liderimiz Heydər Əliyev Azərbaycanı xaosdan, anarxiyadan, parçalanmadan xilas etmişdisə, onun layiqli varisi Prezident İlham Əliyev çağdaş dünyamızda cərəyan edən qlobal proseslərdən, iqtisadi və siyasi böhranlardan, tənəzzüldən qurtararaq ölkəmizdə sürətli inkişafı və sabitliyi bərqərar etmiş, ən yeni tariximizə şanlı səhifələr yazmış və yazmaqdadır", - deyə məqalədə bildirilir.

Prezident Administrasiyasının rəsmisi diqqətə çatdırır ki, minnətdarlıq məktublarının əksəriyyətində vətəndaşlar ölkə Prezidentini xalqa sevdirən yüksək keyfiyyətləri vurğulayır, ona olan ehtiramlarını ifadə edirlər.

Məqalədə qeyd edilir ki, Azərbaycan Prezidentinin 2015-ci ildə imzaladığı 263 qanunun, 285 fərmanın və 693 sərəncamın böyük əksəriyyəti bilavasitə ölkənin qanunvericilik bazasının təkmilləşdirilməsinə, iqtisadi və siyasi idarəçiliyinin tənzimlənməsinə, əhalinin sosial müdafiəsinin, vətəndaşların hüquq və azadlıqlarının təmin edilməsinə istiqamətlənib. Xüsusilə son vaxtlar korrupsiyaya, vəzifəli şəxslərin öz səlahiyyətlərindən sui-istifadə etməsinə, həmçinin ayrı-ayrı qruplar tərəfindən ictimai asayişin pozulmasına, dini ekstremizmə qarşı mübarizənin gücləndirilməsinə, həyatın bütün sahələrində nizam-intizamın və qayda-qanunun möhkəmləndirilməsinə yönəldilmiş normativ hüquqi aktların qəbul edilməsi vətəndaşlar tərəfindən yüksək qiymətləndirilib. Azad, demokratik, hüquqi dövlətin əsaslarını möhkəmlətmək, dini ekstremizmin və ayrı-seçkiliyin qarşısını qətiyyətlə almaq üçün ölkə Prezidentinin atdığı addımları dünya ictimaiyyəti də müsbət qarşılayıb.

Digər xəbərləri Azərbaycan dilində xüsusi Facebook səhifəmizdə izləyə bilərsiniz.