Tellinin xəngəli, Teymur əminin "tüfəngi", Gürcüstandakı Qulqpoyan dayı və...

Day.Az представляет новость на азербайджанском языке

Milli.Az jurnalist İntiqam Valehoğlunun müəllif layihəsi olan "Həftəbecər"i (96-cı say) təqdim edir.

İki həftədir Qulpqoyan dayıdan yazmıram, az qala məni xalq düşməni elan edəsiniz. Məlumunuz olsun ki, kişi Gürcüstana maşın gətirməyə gedib. Orada da həmin vaxt parlament seçkiləri keçirilirmiş. Görüblər ki, düz danışan, sözünü deyən adamdır, deyiblər, bir gün də qal seçkiləri müşahidə elə, sonra gedərsən. İndi dəqiq bilmirəm, seçkidən sonra qayıdacaq, yoxsa orada qalacaq. Nöşün ki, ağsaqqal qadın tayfasına yaman meylli adamdır. Bir də gördün orada Ninodan, Tamaradan biri çıxdı qabağına, ilişdi qaldı Gürcüstanda. İndi də keçək başqa xəbərlərimizə.

Şou əhli cəmiyyətdə nüfuzunu necə itiribsə, kimin yanından azca yel ötən kimi onlardan görürlər. Əslində, camaatı da qınamalı deyil. Elə biri mən özüm. Vay odur ki, bir zənən şou nümayəndəsi haqda iki cümlə tənqid yazasan. O dəqiqə "sponsorları" adama hücum çəkir. Ona görə bəzən kimin neçə "sponsor"unun olduğunu öyrənmək üçün bir-iki cümlə tənqid yazıram, bəs edir. Yeri gəlmişkən, adətən, həmin imkanlı şəxslərin yaşı 40-dan 70-ə qədər olur. Hə, onu deyəcəkdim axı. Saytlar kriminal aləmlə bağlılıqları olan şou nümayəndələrinin siyahısını hazırlayıblar. Əməkdar artist Mətanət İsgəndərlidən tutmuş, Eyyub Yaqubova qədər xeyli adlar var o siyahıda. İntəhası, adı siyahıda olanların əksəriyyəti müxtəlif formada bu əlaqələrdən imtina edirlər. Təkcə mərhum xalq artisti İlhamə Quliyevanın bu mənada cəsarəti alqışa layiq idi. Yadınızdadırsa, sənətkar adının Hacı Məmmədovla hallandırılmasına belə reaksiya vermişdi:

"Hacı Məmmədov bütün sənət adamlarını qəbul edirdi, süfrələr açırdı. Onun "qara işləri"ndən bizim heç birimizin xəbərimiz yox idi. Mən anamı "Qarabulağ"a aparırdım. Anam orada dincəlməyi sevirdi. Hacı Məmmədov şəklimi "Qarabulağ"ın girişində qoyub, məni reklam edirdi. Mənim Hacı Məmmədovla o qədər şəkillərim var ki? Müxalifət qəzetlərindən biri mənim Hacı Məmmədovla şəklimi dərc eləmişdi. Baş redaktora zəng edib, dedim ki, ay qardaş, o yaxşı şəkil deyil, məndə Hacının cürbəcür şəkilləri var, istəyirsinizsə, sizə göndərim".

Xalq artisti Fidan Hacıyeva nadir hallarda müsahibə verən sənətçilərdəndir. Bunun da özlüyündə iki səbəbi ola bilər. Birincisi, sənətçi tamaşaçı, oxucu qarşısına hansısa yeniliklə çıxmaq istəyir. İkincisi isə əlçatmaz görünmək istəyi ola bilər. Mən də deyirəm ki, hər nə niyyətlə belə edirsə, Allah qəbul eləsin. Bu günlərdə bir müsahibə verib. Elə müsahibənin başlığı diqqətimi çəkdi, heç oxumadım da: "Gərək kişini yedizdirəsən, sonra istəyini deyəsən".

Fidan xanım, bəs bu 7-8 "sponsor" olanlar hansını birinci yedizdirsin? Bu yazıqlar əldən düşərlər ki. 7-8 nəfəri yedizdirəndən sonra adamın istəyini deməyə halı qalar? 
 
Meyxanaçı Rəşad Dağlı uzun müddət idi ki, efirə çıxmırdı. Uzun fasilədən sonra bir verilişdə qonaq oldu. Elə aparıcıyla verilişlərin səviyyəsindən danışırdılar ki, birdən Telli Borçalı girdi məclisə. Pis yerə yozmayın, amma bu yerdə məni Səyavuş Aslan demişkən, gic gülmək tutdu. Hələ də başa düşmürəm ki, niyə belə oldu. Bəlkə də "verilişə xəngəl yeyib gəlmişəm" dediyinə görə idi. Hər nəyə görə idisə, Telzada Kurbanovaya (əsl adı və soyadı belədir) təşəkkür düşür. Amma gərək səhər tezdənə də nə yeyəcəyini deyərdi.

Xanəndə Elnarə Abdullayeva haqda çoxdandır yazmırıq. Həmkarlarımızla söhbətində deyib ki, onların nəslində ikinci dəfə ərə getmək olmaz. Nədənsə bu açıqlamadan sonra da bir xeyli güldüm. Sağ olsunlar, bütün həftəni bu sənət adamlarının sayəsində deyib gülürük də.

Əməkdar artist Zöhrə Abdullayevanın da bu açıqlamasına toxunaq, sonra keçək Teymur əmiyə. Zöhrə xanım verilişlərdən birində gənc müğənniləri tənqid edib. Tənqid deyəndə ki, olduğunu deyib:

"Müğənnilər var ki, pullananda çaşırlar. Kasıbçılıqdan gəlib xalqın hesabına pullanırsız, varlanırsız, sonra da qudurursuz. Olmaz belə. El o müğənnini qəbul etməsə, istəyir lap dombalaq aşsın, o qəbul olunmayacaq. Mən bu cür danışanda çoxu mənə nifrət edir, eybi yox, qoy etsinlər. Onların mənə heç sevgisi də lazım deyil".

Zöhrə xanım, dediklərinizlə ikiəlli razıyam. Amma bir incə məqam var. Müğənni var ki, ildə bir dəfə toya çağırmırlar, bəs onları kim qaldırır?

Gəldik çıxdıq Teymur əmiylə Mətanət Əsədovanın məşhur söhbətinə. Deməli, xalq artisti Teymur Mustafayev verilişlərin birində Mətanət Əsədovayla qonaq olub. Muğam deyişməsinin şirin yerində, Teymur əmi qayıdasan ki, sənə qurban olum, ceyran Mətanət. Ovçuyam, yaxınına gələ bilmirəm. Çünki tüfəngim paslanıb, ata bilmirəm. Ovçuyam, könlüm pərvaz, Mətanət, eyləmə naz. Gəl gir, əminin qoluna. Atım saz, tüfəngim saz. Qəti qorxusu yoxdur. Mən bilən Teymur əminin yaşı 75-i keçib. Yəni nəinki tüfəng, heç bu yaşda tapança da işə yaramaz. Ağsaqqalın yaşını və başını nəzərə alanda (yeri gəlmişkən, saçına rəng qoyur) adam bir az duruxur. Sonra da düşünürsən ki, adam həyatda iki dəfə uşaqlaşır. Onlardan biri də yetmiş yaşdan sonraya təsadüf edir. Elə əmi də bunu nəzərə alıb başının hənasını kəm eləmir. 
Deyirlər ki, ağsaqqallar gənclərə nümunə olmalıdır. İndi Teymur əminin "tüfəngindən" danışdığını görən bir cavan xanəndə çıxıb efirdə "snayper"indən oxusa, qınayacağıq ki, ayıb olsun. Amma...

Digər xəbərləri Azərbaycan dilində xüsusi Facebook səhifəmizdə izləyə bilərsiniz.