"Qarlı hava şəraiti paytaxtın giriş-çıxış yollarında heç bir problem yaratmayıb" - Azəravtoyol

17 февраля 2017 13:16

Day.Az представляет новость на азербайджанском языке

Qarlı hava şəraiti "Azəravtoyol" ASC-nin balansında olan Bakının əsas magistral yollarında, o cümlədən paytaxtın giriş-çıxış yollarında heç bir problem yaratmayıb.

Day.Az xəbər verir ki, istipress-in "Azəravtoyol" ASC-nin mətbuat katibliyinin rəisi Anar Nəcəflidən aldığı məlumata görə, bəzi ərazilərdə texnika təmizlik işləri aparmaqda çətinlik çəkir: "Söhbət bəzi tunellərdən, enişli-yoxuşlu yollardan gedir. Bəzi sürücülər hazırlıqlı olmadığından olduqca aşağı sürətlə hərəkət etdiyindən və ya yolda qaldığından tıxac yaranır, texnikamız həmin ərazilərə çata bilmir. Məcburiyyətdən oradakı işlər canlı qüvvəmiz tərəfindən aparılır. Aparılan işlərə 400-dək müxtəlif təyinatlı texnika, texnika girə bilməyən yerlərə isə ASC-nin əməkdaşları cəlb olunublar".

Anar Nəcəfli bildirib ki, hazırda əsas yolların heç birində problem yoxdur: "Bakı-Sumqayıt şosesi, Ziya Bünyadov prospekti, Heydər Əliyev prospekti, Bakı Dairəvi - 1 yolu, Bakıətrafı digər yollarda hər hansı problem müşahidə olunmur. Balansımızda olan digər yollarda isə əməkdaşlarımız təmizləmə işləri həyata keçirirlər".

Digər xəbərləri Azərbaycan dilində xüsusi Facebook səhifəmizdə izləyə bilərsiniz.