“Xocalı soyqırımı” kitabı macar dilində nəşr edilib

Day.Az представляет новость на азербайджанском языке

Xocalı soyqırımının 25 illiyi münasibəti ilə Azərbaycanın Macarıstandakı səfirliyi tarix elmləri doktoru, Milli Məclisinin sabiq deputatı Havva Məmmədovanın "Xocalı soyqırımı" kitabını macar dilində nəşr edib.

Səfirlikdən Trend-ə verilən məlumata görə, indiyə qədər bir sıra dillərə tərcümə olunan bu əsər 1992-ci ilin fevral ayında tarixi Azərbaycan şəhərində yaşanan insanlıq dramının bütün dəhşətlərini əks etdirir.

Kitaba Xocalı qurbanlarının tam siyahısı və erməni vəhşiliyini göstərən çoxsaylı illüstrativ material əlavə olunmuşdur. Səfir Vilayət Quliyevin yazdığı əhatəli müqəddimədə Xocalı soyqırımının memarı olan müasir Ermənistan rəhbərliyinin yalnız Azərbaycan xalqı deyil, insanlıq və müasir sivilizasiya qarşısında, bəşəri dəyərlər qarşısında məsuliyyət və cavabdehlik məsələsi qaldırılır.

Bir sıra macar saytları artıq kitabdan Xocalı soyqırımı şahidlərinin və xarici media nümayəndələrinin şahid ifadələrini öz səhifələrində yerləşdiriblər. Əsərin macar dilində nəşri haqqında ölkənin aparıcı mətbuat orqanlarından biri olan "Madyar Hirlap" qəzetində ayrıca məlumat verilib.

Kitabın bütün tirajının Macarıstan Parlamentinin üzvləri, mətbuat və qeyri-hökumət təşkilatlarının nümayəndələri, kitabxanalar və ayrı-ayrı tanınmış ictimai-siyasi xadimlər arasında yayılması nəzərdə tutulur.

Digər xəbərləri Azərbaycan dilində xüsusi Facebook səhifəmizdə izləyə bilərsiniz.