Kiyevdə UAGB-ın 1 ci Tibb Konfransi keçirilir – FOTO

Day.Az представляет новость на азербайджанском языке.

Kiyev şəhərində Ukrayna Azərbaycanlı Gənclər Birliyinin 1 ci Tibb Konfransi keçirilir.
 

Day.Azın Ukrayna Azərbaycanlı Gənclər Birliyinin Mətbuat xidmətində istinadən verdiyi xəbərə görə, Azərbaycanın Ukraynadakı səfirliyində bu gün bu ölkədəki azərbaycanlı gənclərin I Tibb Konfransı öz işinə başlayıb.

Konfrans Azərbaycanın Ukraynadakı Səfirliyinin, Ukrayna Azərbaycanlı Gənclər Birliyinin (UAGB), Sağlam Ailə tibb mərkəzinin təşkilatçılığı ilə keçirilir.

Konransda Azərbaycanın Ukraynadakı səfiri Eynulla Mədətli, Ukrayna Səhiyyə Nazirliyinin beynəlxalq tədris proqramları idarəsinin rəhbəri Nataliya Morozova, Kiyev Milli Tibb Universitetinin rektoru Katerina Amasova, Ukrayna Milli Tibb Akademiyasının baş elmi katibi, Vladimir Mixnov, Türkiyə, Almaniya, Ukrayna və Fransanın tibb universitetlərinin azərbaycanlı tələbələri və məzunları, eləcə də Ukraynanın tanınmış tibb alimləri iştirak edirlər.
 

Konfrans Heydər Əliyevin Kiyevin mərkəzindəki abidəsini ziyarətlə başlayıb.

Konfransın açılışında çıxış edən UAGB- nin sədri Anar Tahirov bildirib ki, tədbirin keçirilməsində əsas məqsəd dünyanın bir çox ölkələrinin ali tibb ocaqlarında təhsil alan, Azərbaycanlı tələbə , məzun və tibb mütəxəssisləri arasında əlaqələrin yaradılmasıdır: "Eyni zamanda onlar arasında təcrübə mübadiləsinin aparılması və gələcəyin tibb mütəxəssisləri arasında Koordinasiya Şurasının yaradılmasıdır".
 

Çıxış edən Azərbaycanın Ukraynadakı səfiri Eynulla Mədətli bildirib ki, bu ölkənin müxtəlif ali təhsil ocaqlarında 6 min azərbaycanlı tələbə təhsil alır. O qeyd edib ki, bunlardan 2 minə yaxını tibb sahəsinin payına düşür. Səfir bu konfransın gələcək fəaliyyət üçün stimul verəcəyini bildirib.

Ukraynanın həkim və alimlərinin konfransda iştirakının əhəmiyyətli amil olduğunu deyən diplomat deyib ki, tələbələr ilə aparılacaq fikir mübadiləsinin gələcəkdə səmərəli bəhrə verəcək.
 

Ukraynanın səhiyyə nazirinin müavini bildirib ki, son illərdə Azərbaycandan Ukraynanın tanınmış ali məktəblərinə tibb bölmələrinə azərbaycanlı gənclərinin marağı artıb. Nazir müavini əminliklə qeyd edib ki, Ukraynada təhsil alan azərbaycanlı gənclər gələcəkdə öz ölkələrinə mükəmməl mütəxəssis kimi dönəcəklər. Tədbirdə Ukraynanın tibb elmləri doktoru azərbaycanlı Aydın Salmanovun akademik Zərifə xanım Əliyevanın xatirəsinə həsr olunmuş "Cərrahiyyədə riskin idarə olunması" adlı elmi əsərinin təqdimatı da olub.
 

Tədbirdə dünyanın müxtəlif ölkələrinin tibb ocaqlarında təhsil alan 150 azərbaycanlı tələbənin qatıldığını bildirən UAGB-nin sədr müavini Cavid Hüseynzadə qeyd edib ki, gün ərzində 3 panel üzrə müzakirələr aparılacaq.

Panel üzrə aparılan müzakirələrdə tələbələr ilə tanınmış tibb mütəxəssisləri arasında fikir mübadilələri aparılacaq.
 

Konfrans panellərlə davam edir.

Böyütmək üçün şəkillərə klikləyin: