Avropa Birliyi rəsmisi Azərbaycanda keyfiyyət dəyişikliyini yüksək qiymətləndirir

Day.Az представляет новость на азербайджанском языке

İyulun 16-17-də Beynəlxalq Avrasiya Mətbuat Fondunun (BAMF) təşkilatçılığı ilə Avropa İttifaqının Azərbaycan nümayəndəliyinin rəhbəri Kestutis Yankauskas Azərbaycanın müharibədən zərərçəkmiş Tərtər və Bərdə rayonlarında səfərdə olub.

Day.Az Trend-ə istinadən xəbər verir ki, səfər çərçivəsində Aİ rəsmisi Bərdə rayon İcra Hakimiyyətinin başçısı Vidadi İsayevlə görüşüb.

V.İsayev son illər Bərdədə aqrar, təhsil, sahibkarlığın inkişaf etdirilməsi istiqamətində görülən işlərdən danışıb, müharibənin törətdiyi çətinliklərə baxmayaraq, ölkəmizdə sosial-iqtisadi sahədə əldə olunan nailiyyətlər və imkanların artmasına dair fikirlər bildirib. O, Aİ-nin Bərdədə təsərrüfat imkanlarının artırılması, kiçik və orta sahibkarlığın inkişaf etdirilməsi, peşə-təhsili sahəsində müasir standartların tətbiqi üçün göstərdiyi təşəbbüsləri yüksək dəyərləndirdiyini ifadə edib.

V.İsayev BAMF-ın uzun müddətdir ki, müharibədən zərərçəkmiş regionlarda uğurlu sosial-humanitar fəaliyyətinə toxunub və birgə əməkdaşlıq üçün imkanlardan söz açıb: "Bu gün ölkə rəhbərliyinin qarşıya qoyduğu tapşırıqlara uyğun olaraq qeyri-neft sektorunun inkişaf etdirilməsi istiqamətində çoxşaxəli işlər aparılmaqdadır. Biz də öz növbəmizdə Bərdə rayonunun kənd təsərrüfatı imkanlarından istifadə edib, bir neçə məhsul üzrə Bərdə brendinin yaradılması istiqamətində işlər aparırıq. Bu istiqamətdə çoxtərəfli əməkdaşlığa və Avropa təcrübəsindən yararlanmağa hazırıq".

Aİ rəsmisi Bərdədə gördüklərindən məmnun qaldığını və Aİ-nın müharibədən zərərçəkmiş regionlarda peşə-təhsili istiqamətində fəaliyyətləri dəstəklədiyini bildirib. O, Aİ-nın yardımı ilə Bərdə Peşə Təhsil Məktəbinin imkanlarının artırılması istiqamətində layihənin yenicə başladığını və regionda ilk irimiqyaslı proqramlardan olduğunu vurğulayıb. K.Yankauskas ölkədə ümumilkdə keyfiyyət dəyişikliyinin həyata keçirildiyini bildirib. O, Aİ ilə Azərbaycan arasında razılaşdırılmış son sənədlərin bir sıra sahələrdə, ən əsası isə təhsil və sosial sahənin inkişafına ciddi imkanlar yaratdığını qeyd edib, qarşılıqlı əməkdaşlığın, təcrübə mübadiləsinin faydalarından söz açıb.

BAMF prezidenti Umud Mirzəyev müharibədən zərərçəkmiş ərazilərdə sosial infrastruktur layihələrin əhəmiyyətinə toxunub. O, Aİ-nın qaçqın və məcburi köçkünlərin həyat şəraitinin yaxşılaşdırılması, onların təhsil və peşə bacarıqlarının artırılması istiqamətində təşəbbüslərinin əhəmiyyətinə, ən başlıcası isə işğal faktının aradan qaldırılması, müharibədən zərərçəkmiş insanların öz doğma yurd-yuvalarına qayıtması, sülhməramlı aksiyalar və proqramların vacibliyinə toxunub.

Səfər proqramına uyğun olaraq, Aİ rəsmisi Bərdə Peşə Təhsil Məktəbinin fəaliyyəti ilə, Bərdə rayonunda pambıqçılığın inkişafı istiqamətində görülən işlərlə və rayonun tarixi-mədəni irsi ilə yaxından tanış olub.

Aİ rəsmisi və BAMF nümayəndələri Tərtər rayon İcra Hakimiyyəti başçısı Müstəqim Məmmədovla da görüşüblər. Görüş zamanı Tərtər rayonunun ictimai, iqtisadi potensialı müzakirə edilib, kənd təsərrüfatı sahəsində son illər görülən işlər barədə qonağa ətraflı məlumat verilib.

M.Məmmədov xüsusilə keçən il buğda, pambıq və çuğundur məhsullarının yığımına görə Tərtər rayonun Azərbaycanda birinci yerdə olduğunu qeyd edərək eyni zamanda bu ildə də əkin sahələrinin artırıldığını və yerli sakinlərin kənd təsərrüfatı sahəsinə cəlb olunmasının vacib olduğunu vurğulayıb.

Bundan əlavə, görüşdə Tərtər rayonunda kənd təsərrüfatı ilə məşğul olan insanların ciddi su çatışmazlığı ilə üzləşdiyindən danışılıb. Xüsusən işğal altında olan torpaqlarımızda yerləşən Sərsəng su anbarından gələn suyun qarşısı kəsildiyi üçün yay aylarında yerli sakinlər öz əkin sahələrini suvarmaq üçün böyük çətinlik çəkir. Bu problem Tərtər sakinlərini həm psixoloji həm də iqtisadi çətinliklə üz-üzə qoyur. Təbii ki, bu problemin qismən aradan qaldırılması üçün dövlət tərəfindən eləcə də beynəlxalq humanitar təşkilatlar tərəfindən Tərtərdə 600 artezian su quyuları qurularaq yerli sakinlərin istifadəsinə verilib. Qeyd edilən çətinliyə baxmayaraq bu gün Tərtərdə kiçik və orta sahibkarlığın inkişafına dəstək verilir. Sahibkarlar xüsusən müxtəlif tərəvəzlərin, meyvə sortlarının yetişdirilməsi və satışı ilə məşqul olurlar.

K.Yankauskas ətraflı məlumat üçün öz təşəkkürünü bildirərək, kənd təsərrüfatı ixtisaslı kadrların yetişdirilməsi, müasir innovativ metodların tətbiq edilməsi ilə məhsuldarlığın daha da artırılmasının vacib olduğunu vurğulayıb. Görüşün sonunda tərəflər bir birlərinə xatirə hədiyyələri təqdim etdilər və Aİ layihələrinin qaçqın və məcburi köçkünlərin kompakt yaşadığı ərazilərdə həyata keçirilməsinin kənd təsərrüfatının daha da inkişaf etdirilməsinə böyük töhvə verəcəyini vurğulayıblar.

Tərtər rayonun kənd təsərrüfatı imkanları ilə daha yaxından tanış olmaq üçün qonaq, bir sıra təsərrüfat subyektlərinə baxış keçirib. Yerli sakinlərlə müzakirələr aparılıb.

Aİ rəsmisinin regiona səfərinin əsas məqsədlərindən biri də BAMF-ın resursları ilə, həyata keçirilən proqramlar və infrastruktur layihələri ilə daha yaxından tanış olmaq, BAMF-ın ekspertləri, təlimçiləri ilə müzakirələr apararaq gələck əməkdaşlıq perspektivlərinin müəyyənləşdirilməsi idi. Səfər çərçivəsində BAMF-ın prezidenti Tərtərdə və ətraf rayonlarda keçirilən proqramlar, layihələr və peşə yönümlü müxtəlif təlimlər barədə müfəssəl məlumat verib. Bundan sonra Aİ rəsmisi ilə BAMF-ın proqram departamentinin əməkdaşları, yerli ekspertləri ilə birgə müxəlif ideyalar ətrafında müzakirələr aparılıb.

Yolda düşməzdən əvvəl K. Yankauskas səfərin təşkili ilə əlaqədər BAMF-a təşəkkür edib: "Ötən ilin sentyabr ayında mən Azərbaycana gəldiyim zaman bildirmişdim ki, Azərbaycan yalnız Bakıdan ibarət deyil, Azərbaycan daha böyükdür. Bunun üçün ölkənin müxtəlif bölgələrinə, şəhərlərinə gedərək orada yaşayan əhalinin həyatı barədə onların öz dilindən eşitmək lazımdır.

Beləliklə, bu iki günlük səfər mənim bura ilk səfərim deyil, amma ilk dəfədir ki, insanlarla, sahibkarlarla, rəhbərliklərlə görüşmək və müxtəlif layihələrlə, yerli əhalinin ehtiyacları ilə tanış olmaq imkanım oldu. Bir neçə ay əvvəl ilk dəfə olaraq bütün diplomatik korpusların bura səfəri təşkil olunmuşdu, daha sonra biz məcburi köçkünlər üçün yeni tikilmiş yaşayış qəsəbəsini ziyarət etdik, ancaq bu yalnız bir günlük idi və hava soyuq idi. Bu səfər isə bizim üçün gələcəyə yönəlik məsələlər, problemlər və imkanlarla tanış olmaq üçün daha çox imkanlar açmış oldu".

Digər xəbərləri Azərbaycan dilində xüsusi Facebook səhifəmizdə izləyə bilərsiniz.