Atletimiz Avropa birinciliyinin qızıl medalçısı oldu

Day.Az представляет новость на азербайджанском языке

22-29 iyul tarixlərində İtaliyanın Milan şəhərində keçirilən 15 və 17 yaşa qədər yeniyetmə oğlan və qızlar arasında ağır atletika üzrə Avropa birinciliyi davam edir. 40-a yaxın ölkədən 388 atletin (169 qız və 219 oğlan) iştirak etdiyi turnir həmçinin Argentinanın paytaxtı Buenos-Ayresdə baş tutacaq Yeniyetmələrin 3-cü Olimpiya Oyunlarına lisenziya xarakteri daşıyır.

Day.Az Trend-ə istinadən bildirir ki, Milandakı birincilikdə Azərbaycan yığmasının üzvlərindən daha ikisi - Murad Əliyev və Kamil Nəbiyev yaşı 15-ə qədər olan oğlanların mübarizəsində 62 kq çəki dərəcəsində qüvvəsini sınayıblar.

Kamil Nəbiyev birdən qaldırma hərəkətində 80 kq-ın öhdəsindən gələrək bu hərəkətdə 12-ci olub. O, təkanla qaldırma hərəkətində 104 kq-ı ram edərək bu hərəkətdə 9-cu yeri tutub. Toplam 184 kq (80+104) nəticə ilə Kamil Nəbiyev birincilikdə 10-cu yerdə qərarlaşıb.

Murad Əliyev isə bu çəkidə Avropa birinciliyinin qalibi adını qazanıb. Birdən qaldırma hərəkətində 100 kq nəticə ilə bütün rəqiblərini üstələyən atletimiz qızıl medala layiq görülüb. Təkanla qaldırma hərəkətində də uğurlu çıxışını davam etdirən Murad, 118 kq-ı başı üzərinə  qaldıraraq bu hərəkətdə də qalib olub. Toplam 218 kq (100+118) nəticə ilə Avropanın ən yaxşısı adını qazanan Murad Əliyev yekun sıralamada da fəxri kürsünün ən yüksək pilləsinə qalxıb.

Digər xəbərləri Azərbaycan dilində xüsusi Facebook səhifəmizdə izləyə bilərsiniz.