"Ev oyunlarımızda da bu qədər azarkeş görmək istəyirəm"

Day.Az представляет новость на азербайджанском языке

"Çətin oyun oldu. Bu haqda öncədən bilirdik və futbolçuları da məlumatlandırmışdıq. Onlar məşqlərdə, videoanalizlər zamanı tam məsuliyyəti dərk edərək hazırlaşmışdılar".

Day.Az qol.az-a istinadən xəbər verir ki, bu sözləri "Qəbələ"nin baş məşqçisi Sənan Qurbanov Azərbaycan Premyer Liqasının 24-cü turunda bu gün "Keşlə"yə qalib gəldikləri oyundan sonra mətbuat konfrasında deyib.

2:1 hesablı qələbəni şərh edən çalışdırıcı matçın keçirildiyi "Ask Arena"nın meydançasından gileylənib:
 
"Bilirdik ki, rəqib çox aqressiv oynayacaq. Meydançanın da vəziyyətini nəzərə almışdıq. Sevinirik ki, oyunu zədələrsiz və üç xalla başa vurduq. Bu, sevindirici məqamlardandır. Meydança ilə bağlı narahatçılığımız var idi. Oyunöncəsi məşqi də bu arenada etməmişdik. Çünki zədələrdən ehtiyat edirdik. Futbolçular mübarizə apardılar. Mövsümün sonunun gərgin keçəcəyini bilirik. Oyunçuları qələbə münasibətilə təbrik edirəm. Futbolçular hesabda öndə olanda nədənsə müdafiə olunmaq barədə düşünürlər. Bu barədə tapşırıq vermirik, çalışırıq ki, belə olmasın. Amma bəzən konsentrasiya itkisi ilə üzləşirik. "Zirə" ilə görüşdə rəqib bizi buna məcbur etmişdi. Bəzən də top itkiləri üzündən müdafiədə oturmağa məcbur oluruq. Bunu gərginliklə bağlayardım. Komandada rəqabət olmasına çalışırıq. Belə olanda oyunçular istəkli oynayır. Bu gün Davit Volkovi tapşırıqların öhdəsindən gəlməyə çalışdı. Azarkeşlərə təşəkkür edirəm. Əziyyət çəkib yol qət edərək matça gəlmişdilər. Bu qələbə də onlara lazım idi ki, yaxşı əhval-ruhiyyə ilə geri qayıtsınlar. Ev matçlarında da bu qədər azarkeş görmək istəyirəm".

Digər xəbərləri Azərbaycan dilində xüsusi Facebook səhifəmizdə izləyə bilərsiniz.