Ramos İspaniya yığmasının tarixinə keçdi

Futbol üzrə İspaniya yığmasının AÇ-2020-nin seçmə mərhələsi çərçivəsində Farer adalarına 4:1 hesabıyla qalib gəldiyi oyun kapitan Serxio Ramos üçün əlamətdar olub.

Milli.Az goal.az-a istinadən xəbər verir ki, Madrid "Real"ı ilə də çoxsaylı rekord müəllifi olan 33 yaşlı futbolçu ölkəsinin milli komandası ilə ən çox qələbə qazanan oyunçuya çevrilib.

İlk dəfə 2005-ci ildə İspaniya yığmasının formasını geyinən Serxio Ramos, indiyə qədər bu komandanın heyətində 164 oyuna çıxıb. O, bu qarşılaşmalardan 122-də qələbəyə sevinib.

Öncəki rekord İker Kasilyasa məxsus idi. Bir müddət öncə karyerasını başa vurduğunu açıqlayan təcrübəli qapıçı, millidə 121 dəfə qələbə sevinci yaşamışdı.

Digər xəbərləri Azərbaycan dilində xüsusi Facebook səhifəmizdə izləyə bilərsiniz.