Penitensiar müəssisələrə narkotik və telefon keçirilməsinin qarşısı alınıb

Penitensiar xidmətin əməliyyat aparatının həyata keçirdiyi əməliyyat-axtarış tədbirləri nəticəsində 2 saylı Cəzaçəkmə müəssisəsinə və Bakı İstintaq təcridxanasına qadağan olunmuş əşyaların keçirilməsi cəhdləri baş tutmayıb.

Penitensiar xidmətin İctimaiyyətlə əlaqələr şöbəsindən Day.Az-a verilən məlumata görə, Cinayət Məcəlləsinin 28; 317.3; 317.2.1; 66.3; 67.1; 120.2.1; 120.2.11; 181.3.2; 181.3.3; 85.5-ci maddələrinə əsasən 9 il müddətinə azadlıqdan məhrum edilmiş və hal-hazırda 2 saylı Cəzaçəkmə müəssisəsində cəza çəkən məhkum Səlimbəyli Vaqif Etibar oğlu ilə qısamüddətli görüşə gəlmiş qohumu Masallı şəhər sakini Əzimov Əlişan Zakir oğlunun üzərinə və əşyalarına baxış keçirilən zaman gizlədilmiş bir ədəd "SAMSUNG" markalı mobil telefon aparatı və bir ədəd danışıq kartı aşkar edilib.

Cinayət Məcəlləsinin 206.3.2; 234.4.1; 234.4.3-cü maddəsinə əsasən həbs edilmiş və hal-hazırda Bakı İstintaq təcridxanasında saxlanılan Əliyev Əlicəfər Zabit oğlu ilə görüşə gəlmiş qardaşı Bakı şəhər sakini Əliyev İsmayıl Zabit oğlunun üzərinə və əşyalarına baxış keçirilən zaman siqaret qutusunun içərisində gizlədilmiş iki ədəd bükülüdə 1,410 qram narkotik maddə "Heroin" aşkarlanıb.

Hər iki faktla bağlı araşdırma aparılır.

Digər xəbərləri Azərbaycan dilində xüsusi Facebook səhifəmizdə izləyə bilərsiniz.