"Azərişıq" ASC-nin növbəti karvanı iki rayonda 25 min istehlakçının elektrik enerjisi təchizatını yaxşılaşdıracaq.

Day.Az Oxu.Az-a istinadla xəbər verir ki, ASC-nin mətbuat xidmətinin rəhbəri Tanrıverdi Mustafayev jurnalistlərə açıqlamasında bildirib ki, dayaqlardan, yeni komplekt transformator məntəqələrindən (KTM), kilometrlərlə uzunluqda kabellərdən və digər zəruri avadanlıqlardan ibarət yükü "Azərişığ"ın mərkəzi təchizat anbarından götürən ağırtonnajlı yük avtomobilləri Goranboy və Sabirabad rayonunun qəsəbələrinə istiqamət alıb:

"Bu maşın karvanının apardığı 12 KTM, bir neçə min km elektrik verilişi xətləri, dörd min ədəd dəmir-beton dayaqlar, SİP-kabellərlə Goranboy rayonunun Tapqaraqoyunlu, Rus Borisi kəndlərinin, Sabirabad rayonunun Sərxanbəyli və Moranlı kəndlərinin və bəzi digər yaşayış məntəqələrinin elektrik təsərrüfatı yenilənəcək. Göndərilən avadanlıqlar Goranboy və Sabirabad rayonları üzrə 25 min istehlakçını əhatə edəcək.

"Azərişıq" tərəfindən ölkə Prezidentinin göstərişi əsasında Azərbaycan regionlarının, Bakı şəhəri və onun ətraf qəsəbə və kəndlərinin elektrik təsərrüfatında silsilə və kompleks yenidənqurma tədbirləri uğurla davam etdiriləcək".

Xatırladaq ki, bu, 2019-cu ilin əvvəlindən bəri "Azərişıq" tərəfindən genişmiqyaslı yenidənqurma işləri üçün yola salınan 12-ci maşın karvanıdır.

Bundan əvvəl Beyləqan, Ağstafa, Ağsu, Şamaxı, Qəbələ, Cəlilabad, Lənkəran, Sabirabad rayonlarına və Bakının Xəzər rayonunun Binə qəsəbəsi və Binəqədi rayonunun "Kənd Binəqədi", Sulutəpə və Xocasən, habelə Biləcəri qəsəbələrinə belə karvanlar yola salınıb.

"Azərişıq" ölkənin bütün regionlarında, ucqar dağlıq bölgələrində də elektrik təchizatı şəbəkəsinin yenidən qurulması işlərini davam etdirir. Bu işlərin 2019-cu ilin II yarısı ərzində də fasiləsiz davam etdirilməsi nəzərdə tutulur.