3 yaşlı uşağın ölümü ilə bağlı məhkəmədə ekspert: Sənəd saxtalaşdırılıb

Day.Az представляет новость на азербайджанском языке

Bu gün Sumqayıt Şəhər Məhkəməsində 3 yaşlı uşağın ölümündə təqsirləndirilən "Real" Tibb Mərkəzinin həkim-anestezioloqu İsmayıl Qəmbərovun cinayət işi üzrə məhkəmə prosesi davam etdirilib.

Day.Az Trend-ə istinadən xəbər verir ki, hakim Ruqiyyə Səmədovanın sədrliyi ilə keçirilən prosesdə iş üzrə şahid qismində Sumqayıt şəhər Məhkəmə Tibb Ekspertizasının eksperti Mənsur Məmmədov ifadə verib.

Ekspert ifadəsində bildirib ki, uşağın ekspertizaya təqdim edilən xəstəlik tarixçəsi sonradan saxtalaşdırılıb: "Xəstəlik tarixçəsi meyitlə birlikdə ekspertizaya təqdim edilib. Həmin vaxt xəstəlik tarixçəsində uşağın əməliyyat zamanı halının pisləşməsilə bağlı heç bir qeyd göstərilməyib. Tarixçədə göstərilmişdi ki, uşaq əməliyyata hazırlanarkən normal olub, əməliyyatdan sonrakı vəziyyəti xəstəliyin ağırlıq dərəcəsinə uyğundur. Xəstəlik tarixçəsi bir aya yaxın ekspertizada qalıb. Mən xəstəlik tarixçəsində göstərilən qeydləri komissiya ekpertizasında da qeyd etmişəm. Amma sonradan rəyi müstəntiq götürüb və əlavələr edib".

Prosesdə çıxış edən təqsirləndirilən şəxs İsmayıl Qəmbərovun vəkili Əli Hüseynov vəsatət qaldırıb. Vəkil təkrar ekspertizanın keçirilməsini istəyib.

Məhkəmə müşavirəyə yollanıb.

Noyabrın 16-da məhkəmə vəsatətin təmin edilib-edilməməsi barədə qərar verəcək.

İttihama görə, Sumqayıt şəhər sakini, 2014-cü il təvəllüdlü Qurbanlı Arzu Sənan qızı 2016-cı il iyunun 16-da günorta saatlarında Sumqayıt şəhərindəki "Real" Tibb Mərkəzində boğazında damaq badamcıqlarının (qlanda) iltihabından əməliyyat olunub. Həmin gün gecə saatlarında uşağın vəziyyəti pisləşib və o, dünyasını dəyişib. Meyit ekspertizaya göndəriləndən sonra uşağın boğulma nəticəsində dünyasını dəyişdiyi müəyyən edilib.

Faktla bağlı Sumqayıt şəhər Prokurorluğunda Cinayət Məcəlləsinin 124-cü (ehtiyatsızlıqdan adam öldürmə) və 320.1-ci (Rəsmi sənədləri, dövlət təltiflərini, möhürləri, ştampları, blankları saxtalaşdırma, qanunsuz hazırlama, satma və ya saxta sənədlərdən istifadə etmə - hüquq verən və ya vəzifədən azad edən vəsiqəni və ya digər rəsmi sənədi istifadə etmək məqsədi ilə saxtalaşdırma və ya qanunsuz hazırlama, yaxud bu cür sənədi satma, habelə eyni məqsədlə Azərbaycan Respublikasının saxta dövlət təltifini, ştampı, möhürü, blankı hazırlama və ya satma) maddələri ilə cinayət işi başlanılıb və "Real" Tibb Mərkəzinin həkim-anestezioloqu İ.Qəmbərov təqsirləndirilən şəxs qismində cəlb edilib.

Xatırladaq ki, İ.Qəmbərovun barəsində həbs qətimkan tədbiri seçilməyib.

Digər xəbərləri Azərbaycan dilində xüsusi Facebook səhifəmizdə izləyə bilərsiniz.