Peru Azərbaycanla əməkdaşlığın genişləndirilməsi üçün perspektivlər görür - FOTO
Peru Azərbaycanın Qafqazdakı strateji mövqeyini, enerji və ticarət potensialını nəzərə alaraq, Bakıdakı səfirliyinin fəaliyyətini bərpa etməsini Azərbaycanla münasibətlərin inkişafı baxımından mühüm addım kimi nəzərdən keçirir.
Bunu Perunun "La Razón" qəzetində dərc olunan, ölkənin yeni hökumətinin xarici siyasət prioritetlərinə və xarici işlər naziri Karlos Espanın fəaliyyətinə həsr edilmiş məqalədə müəllif Rikardo Sançes Serra yazıb.
Müəllif qeyd edir ki, Perunun Bakıdakı səfirliyinin fəaliyyətinin bərpası xüsusi diqqətlə nəzərdən keçirilməli olan qərarlardan biridir.
"Azərbaycan Qafqazda strateji mövqeyə malikdir və mühüm enerji və ticarət mərkəzidir",-deyə məqalədə vurğulanır.
Müəllifin fikrincə, iki ölkə arasında münasibətlərin daha da inkişaf etdirilməsi təkcə diplomatik deyil, həm də iqtisadi əhəmiyyət daşıya bilər. Xüsusilə o, Azərbaycanın Peruda investisiyalar yatırması ilə bağlı son açıqlamalara diqqət çəkir. Nəşrdə qeyd olunur ki, bu, ikitərəfli əməkdaşlığın genişləndirilməsi üçün əhəmiyyətli potensialın mövcudluğundan xəbər verir.
Məqalədə vurğulanır ki, Azərbaycanla qarşılıqlı əlaqələrin möhkəmləndirilməsi Perunun müxtəlif beynəlxalq tərəfdaşlarla münasibətlərin inkişaf etdirilməsi, eləcə də yeni iqtisadi və ticarət imkanlarının formalaşdırılmasına yönəlmiş daha geniş siyasətinə uyğundur.
Müəllif, həmçinin, Perunun Mərakeş, Çili və Braziliya da daxil olmaqla, digər ölkə və regionlarla bağlı xarici siyasət prioritetlərinə nəzər salaraq, Limanın balanslaşdırılmış xarici siyasət yürütməsinin və strateji tərəfdaşlıqları möhkəmləndirməsinin zəruriliyini qeyd edir.
Məqalədə Perunun Xarici İşlər Nazirliyinin ölkənin xarici siyasət kursunun həyata keçirilməsindəki roluna xüsusi diqqət yetirilir. Müəllif milli maraqların müdafiəsinə, beynəlxalq əməkdaşlığın genişləndirilməsinə və Peru biznesi üçün yeni imkanların yaradılmasına yönəlmiş diplomatiyanın inkişaf etdirilməsinin zəruriliyini vurğulayır.
Nəşrin yekun hissəsində vurğulanır ki, Perunun xarici siyasət idarəsinin rəhbərinin qarşısında duran əsas vəzifə irəli sürülmüş baxışı ölkənin beynəlxalq arenadakı mövqelərini möhkəmləndirməyə imkan verəcək praktiki dövlət siyasətinə çevirməkdir.
Заметили ошибку в тексте? Выберите текст и сообщите нам, нажав Ctrl + Enter на клавиатуре
