Bozdağ Hökməli” vulkanının ətrafındakı evlər qanunsuz inşa edilib - RƏSMİ
Day.Az представляет новость на азербайджанском языке
Abşeron rayonunun Hökməli qəsəbəsindəki "Bozdağ Hökməli" palçıq vulkanının ətrafında tikilən evlər qanunsuz inşa edilib.
Day.Az Trend-ə istinadən bildirir ki, bunu Hökməli qəsəbə inzibati ərazi dairəsi üzrə icra nümayəndəsi Müseyib İbrahimov deyib.
Onun sözlərinə görə, vulkandan bir qədər kənarda - "Nübar" yaşayış sahəsində 4-5 fərdi evin divarlarında çatlar yaranıb.
Əraziyə müəyyən qurumların mütəxəssisləri tərəfindən baxış keçirildiyini deyən M.İbrahimov qeyd edib ki, həmin evlərin sakinlərinin köçürülməsi gündəmdə deyil: "O evlərin hamısı qanunsuz tikilib, heç birinin sənədi yoxdur. İcra nümayəndəliyi torpaqla bağlı heç bir qərar vermir. 1999-cu ildən mənzil-tikinti üçün torpaqların ayrılması səlahiyyəti bələdiyyələrə verilib. Yəqin ki, dövlət səviyyəsində nə isə bir tədbir görüləcək".
Ekologiya və Təbii Sərvətlər Nazirliyinin (ETSN) Milli Geoloji Kəşfiyyat Xidmətinin geoloji planlama ekspedisiyasının rəisi Əziz Qaralov Trend-ə deyib ki, "Bozdağ Hökməli" vulkanının çöküntüləri üzərində tikilən evlərdə çatların yaranma prosesi tam sakitləşməyib. Bu ərazidə nisbi aktivlik müşahidə edilir.
Qeyd edək ki, evlərdə yaranan bəzi çatların eni 50 sm-ə çatıb.
Digər xəbərləri Azərbaycan dilində xüsusi Facebook səhifəmizdə izləyə bilərsiniz.
Заметили ошибку в тексте? Выберите текст и сообщите нам, нажав Ctrl + Enter на клавиатуре
