Xaçmazın Xanoba kəndində “Yaşıl dünya naminə həmrəylik ili” çərçivəsində ağacəkmə aksiyası keçirilib

Xaçmaz Rayon İcra Hakimiyyətinin təşkilatçılığı ilə növbəti ağacəkmə aksiyası Gəndob-Xaçmaz-Yalama-Rusiya sərhədi avtomobil yolunun Xanoba kəndi ərazisində keçən hissəsində təşkil olunub.

Day.Az xəbər verir ki, aksiyada Rayon İcra Hakimiyyətinin başçısı Elnur Rzayev, yerli hüquq mühafizə orqanlarının rəhbərləri, idarə, müəssisə və təşkilatların kollektivləri, şəhid ailələri, qazilər və rayon ictimaiyyətinin nümayəndələri iştirak ediblər.

Aksiya iştirakçıları tərəfindən ərazidə müxtəlif növ ağaclar əkilərək suvarılıb və aqrotexniki qulluq göstərilib. Əkilən ağacların küləkdən qorunması üçün dirəklər basdırılıb. Ümumilikdə Xanoba kəndi ərazisində 1000-ə yaxın ağac əkilib.

"Yaşıl dünya naminə həmrəylik ili" çərçivəsində payız mövsümündə rayon ərazisində yaşıllıqların artırılması məqsədilə aksiyaların davam etdirilməsi nəzərdə tutulur.