Marneulidə gənc rəssamların “Ağ və qaranın harmoniyası” adlı sərgisi açılıb - FOTO
Gürcüstanın Marneuli şəhərindəki "Tea House"da (Çay Evi) gənc rəssamların "Ağ və qaranın harmoniyası" adlı rəsm sərgisi açılıb.
AZƏRTAC xəbər verir ki, sərgidə "Çay Evi"nin rəsm kursunun tələbələrinin kətan üzərində kömür və sadə qələmlə çəkilmiş 40-dan çox əsəri nümayiş etdirilib.
Eyni zamanda, açıq havada sərbəst mövzuda müxtəlif rəsmlər çəkilib.
"Tea House"nin rəhbəri Emin Əhmədov bildirib ki, sərginin məqsədi regionda incəsənətin inkişafına, yeniyetmə və gənclərin bu sənətə və ümumiyyətlə incəsənətə marağının artırılmasıdır.
Onun sözlərinə görə, "Tea House"da kompüter texnologiyaları, rəssamlıq, şahmat və digər sahələr üzrə təhsil alan tələbələrin sayı günbəgün artır. Bu da ümumilikdə onların elmə marağının artmasına, mədəniyyətimizin təbliğinə və gənclərin asudə vaxtlarının səmərəli təşkilinə imkan yaradır.
Qeyd edək ki, "Tea House"da gənclərin inkişafı üçün nəzərdə tutulan bu layihə 2012-ci ildən həyata keçirilir və SOCAR tərəfindən maliyyələşir. Bu günə qədər layihədən 12 mindən çox tələbə, yeniyetmə və gənc faydalanıb.
Заметили ошибку в тексте? Выберите текст и сообщите нам, нажав Ctrl + Enter на клавиатуре
