Latviya Ticarət və Sənaye Palatası Azərbaycanda yeni layihələrə start verməyə hazırlaşır

Latviya Ticarət və Sənaye Palatası Azərbaycanda yeni layihələrə start verməyə hazırlaşır.

Day.Az xəbər verir ki, bu barədə Trend-ə Latviya Ticarət və Sənaye Palatasının Aİ layihələri departamentinin direktoru Liqa Siçeva (Liga Sičeva) məlumat verib.

"Latviya ilə Azərbaycan arasındakı mövcud ticarət əlaqələrindən danışarkən, bu əlaqələrin inkişaf etdirilməsi və biznes əməkdaşlığının genişləndirilməsi üçün imkanların həmişə olduğunu qeyd etmək vacibdir. Eyni zamanda, bu istiqamətdə əhəmiyyətli potensialın mövcud olduğunu vurğulamaq lazımdır. Ümumilikdə, meyllər müsbətdir. 2019-cu ildə Azərbaycanla təxminən 100-dən az Latviya şirkəti əməkdaşlıq edirdisə, 2023-cü ilə qədər onların sayı təxminən 30 faiz artıb. Bu şirkətlər arasında logistika şirkətləri, qida sənayesi müəssisələri, İT şirkətləri və digər sektorların nümayəndələri yer alır. Bundan əlavə, "yaşıl" texnologiyalar, informasiya-kommunikasiya texnologiyaları, təhsil, dizayn, tibb, sertifikatlaşdırma və digər sahələrdə fəaliyyət göstərən təşkilat və müəssisələr üçün də perspektivlər görürük", - deyə o bildirib.

Onun sözlərinə görə, Latviya və Azərbaycan arasındakı ticarət əlaqələri böyük potensiala malikdir, çünki hər iki ölkə qismən ortaq tarixə sahibdir və bir-birini yaxşı anlayır.

"Latviya Avropa İttifaqının üzvü kimi Azərbaycana ən yaxşı Avropa təcrübələrini təqdim edə, eyni zamanda ölkənin uğurlu təcrübələrini özünə mənimsəyə bilər. Azərbaycan və ümumilikdə region biznes fəaliyyəti baxımından bizim üçün böyük maraq doğurur. "LEF Network Azerbaijan" layihəsi çərçivəsində biz təkcə Azərbaycanla deyil, həmçinin Estoniya və Finlandiya ilə də əməkdaşlıq edirik. Avropa İttifaqının "Inter-Central Baltic" proqramı tərəfindən maliyyələşdirilən bu layihə dörd ölkəni bir araya gətirərək ixracatın dəstəklənməsinə yönəldilib. Layihə üç il üçün nəzərdə tutulub və biz hazırda ikinci ilin sonuna yaxınlaşırıq. Layihənin son mərhələsi 2025-ci ildə tamamlanacaq. Layihə çərçivəsində qarşılıqlı ticarət missiyaları təşkil edirik: latviyalı, estoniyalı və finlandiyalı şirkətlər Azərbaycana səfər edir, azərbaycanlı şirkətlər isə bizə gəlir", - deyə o əlavə edib.

L.Siçeva qeyd edib ki, hər bir missiyada 15 şirkət iştirak edir ki, bu da nümayəndə heyətlərini kifayət qədər genişmiqyaslı edir.

"Missiyaların məqsədi biznesin məhsul distribusiyası, satış, birgə istehsal və xammal tədarükü üçün uyğun tərəfdaşlar tapmasına kömək etməkdir. Biz həmçinin, yeni maliyyə mənbələri axtarır və cari ilin tamamlanmasından sonra, 2025-ci ildə yeni layihələrin işə salınmasına hazırlaşırıq. Biz Azərbaycan biznes təşkilatları ilə əməkdaşlığa açığıq", - departamentin direktoru vurğulayıb.