Azərbaycan nefti bahalaşıb
İtaliyanın Augusta limanında CIF bazisi üzrə Azərbaycanın "Azeri Light" markalı neftinin qiyməti əvvəlki göstərici ilə müqayisədə 0,91 ABŞ dolları və ya 0,78 faiz artaraq bir barel üçün 117,74 ABŞ dollarına çatıb.
Day.Az xəbər verir ki, bu barədə neft bazarı iştirakçılarının məlumatında bildirilib.
Qeyd olunub ki, Türkiyənin Ceyhan limanında FOB bazisi üzrə "Azeri Light" markalı neftin bir barelinin qiyməti 0,92 ABŞ dolları və ya 0,84 faiz artaraq 111,01 ABŞ dolları təşkil edib.
"Urals" markalı xam neftin qiyməti əvvəlki göstərici ilə müqayisədə 0,2 ABŞ dolları və ya 0,25 faiz artaraq bir barel üçün 78,79 ABŞ dollarına çatıb.
Şimal dənizində hasil edilən "Dated Brent" markalı neftin qiyməti isə əvvəlki göstərici ilə müqayisədə 1,98 ABŞ dolları və ya 1,67 faiz azalaraq bir barel üçün 116,43 ABŞ dolları olub.
Azərbaycanın 2026-ci il dövlət büdcəsində bir barel neftin orta qiyməti 65 ABŞ dolları səviyyəsində hesablanıb.
"Trading Economics"in məlumatına görə, çərşənbə günü xam neftin qiyməti 89 dollar/barel səviyyəsinə yaxınlaşıb. Bildirilib ki, ABŞ-İran danışıqlarında irəliləyiş əlamətlərinin ortaya çıxması və Səudiyyə Ərəbistanında əsas neft kəmərinin fəaliyyətinin bərpası istiqamətində işlərin davam etməsi fonunda qiymətlər ardıcıl altıncı sessiyada da geriləyib.
"ABŞ Prezidenti Donald Tramp İran nümayəndələri ilə keçirilən görüşü "çox məhsuldar" adlandırıb. O, danışıqlar yolu ilə razılaşma əldə etməyə çalışmaqla və ya "İslam Respublikasını məhv etmək" arasında seçim etdiyini bildirib. Trampın bu həftənin sonunda digər Fars körfəzi ölkələrinin liderləri ilə də görüşməsi gözlənilir.
İran hökumətinin yüksək vəzifəli rəsmisi bildirib ki, Tehranın təklifi ABŞ-yə çatdırılıb. Onun sözlərinə görə, Vaşinqton İranın neft ixracını ciddi şəkildə məhdudlaşdıran blokadanın aradan qaldırılması istiqamətində addımlar atarsa, Tehran yeddi gün ərzində Hörmüz boğazını yenidən açmağa hazırdır.
Bu arada, Səudiyyə Ərəbistanı yaxın günlərdə mühüm Şərq-Qərb neft kəməri vasitəsilə ixracı bərpa etməyə çalışır. Bu, Ər-Riyada Hörmüz boğazından yan keçən alternativ marşrutdan yenidən istifadə etməyə imkan verəcək", - məlumatda qeyd edilib.
Заметили ошибку в тексте? Выберите текст и сообщите нам, нажав Ctrl + Enter на клавиатуре
