Milli Məclisdən qüsurlu uşaqlarla bağlı AÇIQLAMA

Day.Az представляет новость на азербайджанском языке.


Azərbaycanda hər il dünyaya gələn uşaqların təxminən 100-120-si eşitmə qabiliyyəti məhdud, qüsurlu olur.

"Qafqazinfo"-nun məlumatına görə, bunu parlamentin Sosial siyasət komitəsinin bu gün keçirilən ilk iclasında sözügedən komitənin sədr müavini Musa Quliyev deyib. Onun sözlərinə görə, həmin uşaqların implantasiya edilməsi adambaşına 12-15 min dollar edir ki, bu da təxminən bir milyon yarım vəsait deməkdir: "Bu, büdcədə heç də böyük vəsait deyil. Ona görə görə yaxşı olardı ki, eşitmə qabiliyyəti məhdud, qüsurlu uşaqlarla da bağlı qanun layihəsi hazırlayaq və onu müzakirələrə çıxarıb qəbul edək. Yoxsa, həmin uşaqlar 3 yaşından sonra həm kar, həm də lal olurlar və nə qədər vəsait xərcləsən də, hətta, mliyonlar töksən də onların reabiltasiyası mümkün olmur. Bu baxımdan, həmin uşaqlarla da bağlı qanun qəbuluna ehtiyac var. Həmin qanun qəbul olunarsa və müvafiq implant qoyularsa, onların səhhətində heç bir problem qalmaz, həm eşidər, həm də danışarlar".

Azərbaycan Tibb Universitetinin rektoru, akademik Əhliman Əmiraslanov da həmkarının təklifini dəstəkləyib. O, xatırladıb ki, belə uşaqların sayı ildə hətta, 150-yə yaxın olur. "Onu da deyim ki, bizim universitetin klinikasında bununla məşğul olurlar. Artıq Səhiyyə Nazirliyi ilə də bu yöndə danışıqlarımız gedir. Yəni, biz bildirmişik ki, bizə implant verin, biz onu ödənişsiz həyata keçirəcəyik, qoyacağıq. Şəxsən mən də belə hesab edirəm ki, əgər bu yöndə qanun qəbul olunarsa, bu problem öz həlini tapmış olar. Eyni zamanda, təkcə eşitmə qabiliyyəti zəif olan uşaqlar deyil, bütün uşaqlar müayinədən keçməlidir, bütün doğum evləri müvafiq avadanlıqlarla təmin olunmalıdır".