Respublika Günü münasibətilə Prezident İlham Əliyevə təbriklər gəlməkdə davam edir

28 May - Respublika Günü münasibətilə Prezident İlham Əliyevə təbriklər gəlməkdə davam edir.

BMT-nin Ərzaq və Kənd Təsərrüfatı Təşkilatının (FAO) Baş direktoru Qu Donqyudan:

"Hörmətli cənab Prezident.

Milli bayramınız - Respublika Günü münasibətilə BMT-nin Ərzaq və Kənd Təsərrüfatı Təşkilatı adından və şəxsən öz adımdan Zati-alinizə möhkəm cansağlığı və xoşbəxtlik arzularımı çatdırıram. Xalqınıza sülh və firavanlıq diləyirəm".

***

Mavriki Respublikasının Baş naziri Pravind Kumar Caqnotdan:

"Cənab Prezident.

Ölkənizin milli bayramı - Respublika Günü münasibətilə Zati-alinizə və Sizin simanızda bütün xalqınıza şəxsən öz adımdan və xalqımın adından ən səmimi təbriklərimi çatdırmaqdan məmnunluq duyuram.

Mavriki ilə Azərbaycanı qarşılıqlı hörmət və dostluğa əsaslanan yaxşı ikitərəfli münasibətlər birləşdirir. Mən əminəm ki, bu əlaqələr gələcəkdə daha da möhkəmlənəcək.

Bu xoş fürsətdən istifadə edərək Qoşulmama Hərəkatının sədri kimi ötən il gözəl təşəbbüsə - videokonfrans vasitəsilə COVID-19-la mübarizəyə həsr olunmuş Zirvə görüşünə ev sahibliyi etdiyinizə görə Sizə və Azərbaycan Hökumətinə təşəkkür edirəm. Əminəm ki, belə təşəbbüslər pandemiyadan ciddi zərər çəkmiş ölkələrə, xüsusilə də Afrika və inkişaf etməkdə olan kiçik ada dövlətlərinə yardımın göstərilməsinə, bu çətin zamanda vaksinlərin, dərmanların və tibbi avadanlıqların onlar üçün əlçatan olmasına kömək edəcəkdir.

Zati-aliləri, Sizə ən yüksək ehtiramımı bildirir və əmin-amanlıq arzu edirəm".

***

Dominikan Respublikasının Prezidenti Luis Abinaderdən:

"Zati-aliləri.

Milli bayramınız - Respublika Günü münasibətilə Zati-alinizə ən səmimi təbriklərimi çatdırır, böyük xalqınıza tərəqqi, firavanlıq arzu edirəm".

***

İsrail Dövlətinin Prezidenti Reuven Rivlindən:

"Zati-aliləri.

Ölkənizin milli bayramı - Respublika Günü münasibətilə İsrail xalqı və Dövləti adından Sizə və Azərbaycan xalqına səmimi təbriklərimi çatdırmaqdan şərəf və məmnunluq duyuram.

Azərbaycan Respublikası İsrail Dövlətinin vacib və yaxın tərəfdaşı olmaqla yanaşı, həm də dostu və müttəfiqidir. Bizim tərəfdaşlığımız Azərbaycan və yəhudi xalqlarının qardaşlıq tarixinə, eləcə də millətlərimizin dini tolerantlığı təşviq etmək, nifrəti və antisemitizmi bütün formalarda rədd etmək istiqamətində birgə səylərinə əsaslanır.

İsraildə Azərbaycanın ticarət və turizm nümayəndəliklərinin açılması münasibətilə Sizi və ölkənizi təbrik edirəm, bu, iqtisadi əlaqələrimizi inkişaf etdirəcək və xalqlarımızı daha da yaxınlaşdıracaq. Yaxın gələcəkdə Azərbaycan Respublikasının İsraildə səfirliyinin açılmasını səbirsizliklə gözləyirəm.

Sizə və Azərbaycan xalqına sülh, inkişaf, sabitlik və firavanlıq diləyir, dostluğumuzun hələ də bizim üçün qoruduğu parlaq gələcəyə ümid edirəm.

Zati-aliləri, Sizə böyük hörmət və ehtiramımı bildirirəm".

***

Sudan Respublikasının Suveren Keçid Şurasının sədri Abdel Fattah Abdelrahman Al-Burhandan:

"Zati-ailələri.

Milli bayramınız - Respublika Günü münasibətilə Sizi, ailənizi, Zati-alinizin simasında bütün Azərbaycan xalqını və dövlətini Sudan hökuməti və xalqı adından, şəxsən öz adımdan səmimi-qəlbdən təbrik edirəm.

Bu xoş fürsətdən istifadə edərək ölkələrimiz və xalqlarımız arasındakı mövcud ikitərəfli əlaqələrdən məmnunluq hissi keçirdiyimi bildirir, aramızdakı qardaşlıq və sülh tellərinin getdikcə daha da möhkəmlənəcəyinə əminliyimi ifadə edirəm.

Zati-aliləri, ən yüksək hörmət və ehtiramımı qəbul edin".

***

Laos Xalq Demokratik Respublikasının Prezidenti Thonqlun Sisulitdən:

"Zati-aliləri.

Ölkənizin müstəqilliyinin 103-cü ildönümü - Respublika Günü münasibətilə bütün Laos xalqı adından və şəxsən öz adımdan Zati-alinizə və bütün Azərbaycan xalqına ən səmimi təbriklərimi çatdırıram.

Əminəm ki, Laos Xalq Demokratik Respublikası ilə Azərbaycan Respublikası arasında dostluq münasibətləri və əməkdaşlıq xalqlarımızın rifahı naminə daha da möhkəmlənəcək və inkişaf edəcəkdir.

Zati-aliləri, Sizə ən dərin ehtiramımı bildirirəm".