Bakıda bu taksilər pulsuz imiş

Bakıda taksi xidmətləri ilə bağlı şikayətlər artır. Yalnız sərnişinlər deyil, sürücülər də narazılıq edirlər. Onlar bildirirlər ki, bir sifarişdə bir neçə ünvan qeyd edilir və bu, həm vaxt itkisi, həm də az gəlir deməkdir. Hətta bəzi hallarda sürücülər yalnız birinci ünvana qədər aparır, çatanda sifarişi yekunlaşdırırlar. Haqlı olaraq, bu da vətəndaşın etirazına gətirib çıxarır.

Sürücü sərnişini təyinat nöqtəsinə çatdırmadan sifarişi dayandıra bilərmi? Bu halda ödəniş edilməlidirmi?

Day.Az xəbər verir ki, mövzu ilə bağlı "globalinfo.az"a danışan nəqliyyat eksperti Eldəniz Cəfərovun sözlərinə görə, sürücülər taksi şirkətlərinin şərtlərini əvvəlcədən qəbul edirlər:

"Sürücü sifarişi yarımçıq yerinə yetirirsə, sərnişin ünvana çatdırılmadığı üçün ödəniş etməyə bilər. Bu, vətəndaşın hüququdur. Ümumiyyətlə, taksi sürücüsünün sifarişi şəxsi istəyi ilə və əsaslandırılmadan ləğv etməsi qayda pozuntusudur. Məsələ sərnişinin xeyrinə həll olunmalıdır".
Ekspert bildirib ki, tərəflər hüquq və vəzifələrini bilməlidirlər:

"Təəssüf ki, sərnişinlərin çoxu bundan xəbərsizdirlər. Eyni zamanda, sürücülərin də öhdəlikləri və hüquqları var. Vətəndaş sifariş verdikdən sonra etik qaydalara əməl etməli, sifarişdən imtina edərkən və ya nəqliyyata əyləşdikdə sürücüyə qarşı hörmətli davranmalıdır. Əksər hallarda sürücü günahkar hesab edilsə də, bəzi araşdırmalar sərnişinin də qaydaları pozduğunu göstərir".