Temu və AliExpressdən alınan oyuncaqları

Onlayn platformalarda satılan oyuncaqlar hələ də uşaqlar üçün təhlükə yaratmaqdadır. 

Day.Az xəbər verir ki, bu barədə Avropa Oyuncaq İstehsalçıları Federasiyası (Toy Industries of Europe) və Fransa Oyuncaq və Uşaq Məhsulları İstehsalçıları Federasiyasının (FFJP) 19 noyabrda dərc etdiyi hesabatda bildirilir.

Hesabatda qeyd edilib ki, Avropa və Fransa Oyuncaq İstehsalçıları Federasiyaları 70 oyuncağı yoxlayıb. Onların demək olar ki, hamısının Avropa standartlarına uyğun olmadığı müəyyən edilib.

Ümumilikdə Shein, Temu, AliExpress, Amazon Marketplace, Cdiscount, Fruugo və Joom olmaqla yeddi platformadan alınan oyuncaqlar test edilib.

70 oyuncağın 96%-i akkreditə olunmuş laboratoriya tərəfindən Avropa təhlükəsizlik standartlarına uyğun olmayan məhsul kimi qiymətləndirilib. Bundan əlavə, bu oyuncaqların 86%-i uşaqların təhlükəsizliyi və sağlamlığı üçün ciddi risk daşıyan məhsullar kimi müəyyən edilib. FFJP-nin açıqlamasında deyilir ki, keçən il təhlükəli hesab edilən bəzi məhsulların hələ də satışda olması ayrıca narahatlıq doğurur.

Xüsusilə qeyd olunur ki, balaca uşaqlar üçün nəzərdə tutulmuş bəzi oyuncaqlar udulan və ya nəfəsə çəkilə bilən xırda hissələrdən ibarətdir. Bu, boğulma təhlükəsi yaradır. Bundan başqa, bəzi oyuncaqlarda uşaqların litium batareyalara birbaşa çıxışı var ki, bu da daxili orqanlara ciddi zərər vurma riski yaradır. Asanlıqla çıxarıla bilən vantuzlu hissələr də tənəffüs yollarını bağlayaraq boğulmaya səbəb ola bilər.

Le Figaro yazır ki, bu, Milad bayramına cəmi bir neçə həftə qalmış vəziyyətin nə qədər narahatedici olduğunu göstərir.