Azərbaycanın yeni torpaq xəritəsi hazırlanıb

Qabaqcıl beynəlxalq təcrübəyə uyğun olaraq, ilk dəfə coğrafi informasiya sistemi əsasında Azərbaycanın 1:100.000 miqyasında torpaq xəritəsi tərtib edilib.

Milli.Az bildirir ki, bunu Trend-ə  AMEA Torpaqşünaslıq və Aqrokimya İnstitutunun direktoru Əlövsət Quliyev deyib.

Onun sözlərinə görə, torpaq zonaları tərtib edilərkən bütün məzmun elementlərin (relyef, hidroqrafiya, yaşayış məntəqələri, yol şəbəkəsi, sərhəd və xətti obyektlər və.s) müasir vəziyyəti əks etdirilib. Hər bir torpaq-landşaft zonasına daxil olan torpaq taksonomik vahidləri sistemləşdirilib və torpaq-ekoloji vəziyyəti əks etdirən 27 parametr üzrə münbitlik və mühit amillərinin göstəriciləri atributiv məlumatlar şəklində metaverilənlər formatında toplanıb.

Ə.Quliyev əlavə edib ki, elektron platforma üzərində tərtib olunmuş 1:100 000 miqyasında interaktiv torpaq zonaları xəritəsi respublikamızın torpaq resurslarının tədqiqi, mühafizəsi və istifadənin optimallaşdırılması baxımından mühüm əhəmiyyətə malikdir.

Digər xəbərləri Azərbaycan dilində xüsusi Facebook səhifəmizdə izləyə bilərsiniz.