Azərbaycan və Oman arasında birgə investisiya layihələri və potensial əməkdaşlıq perspektivləri dəyərləndirilib

İqtisadiyyat Nazirliyində Omanın "Suhail Bahwan Group Holding" şirkətinin nümayəndələri ilə keçirilən görüşdə birgə investisiya layihələri və potensial əməkdaşlıq perspektivləri müzakirə edilib.

Nazirlikdən Day.Az-a verilən məlumata görə, bu, iqtisadiyyat naziri Mikayıl Cabbarovun Omanın "Suhail Bahwan Group Holding" şirkətinin nümayəndələri ilə görüşü zamanı baş tutub.

Bildirilib ki, Oman şirkətinin təmsilçilərinə Azərbaycanda qeyri-neft iqtisadiyyatının prioritetləri və xarici sərmayələrin qoyuluşu üçün yaradılmış əlverişli biznes mühiti barədə məlumat verilib, bu sahədə dövlət-özəl tərəfdaşlığının önəmi qeyd olunub.

Vurğulanıb ki, Azərbaycanda əlavə dəyər yaradan istehsalın qurulmasına dövlət tərəfindən göstərilən dəstək tədbirləri, eləcə də, istehsal olunan məhsulun xarici bazarlara ixracı üçün nəqliyyat-logistika infrastrukturu xarici şirkətlər tərəfindən investisiya qoyulması üçün ölkəmizin cəlbediciliyini artırır.

Tərəflər birgə investisiya layihələri, o cümlədən potensial əməkdaşlıq imkanlarını müzakirə ediblər.

Qeyd edək ki, Oman Sultanlığının ən iri holdinqlərindən olan "Suhail Bahwan Group Holding" Körfəz Ölkələri, Şimali Afrika və Cənubi Asiyada fəaliyyət göstərən 30-dan çox şirkətə sahibdir. Holdinq kimya sənayesi, səhiyyə, enerji, logistika, mühəndislik, infrastruktur, informasiya texnologiyaları və telekommunikasiya kimi sektorlarda fəaliyyət göstərir.