Rusiyadan AZAL-ın təyyarəsinin vurulması ilə bağlı təqsirkarların cəzalandırılmasını gözləyirik

Azərbaycan Hava Yollarına məxsus təyyarənin vurulması ilə bağlı Rusiyadan təqsirkarların müəyyənləşdirilərək, məsuliyyətə cəlb olunmasını gözləyirik.

Day.Az xəbər verir ki, bu barədə Xarici İşlər Nazirliyinin 2 iyul 2025-ci il tarixində Rusiya Federasiyasının Azərbaycan Respublikasındakı fövqəladə və səlahiyyətli səfiri Mixail Yevdokimovun XİN-ə çağırılması ilə bağlı məlumatında deyilir.

"Hələ ötən ilin sonundan münasibətlərə mənfi təsir edən Azərbaycan Hava Yollarına məxsus təyyarənin Rusiyanın hava məkanında vurulmasından sonra zəruri müvafiq tədbirlərin görülməməsinin və real vəziyyətin təhrif edilməsi cəhdlərinin, eləcə də Rusiya mediasında bir sıra rəsmi şəxslər və media nümayəndələri vasitəsilə ölkəmizə qarşı dezinformasiya kampaniyasının aparılmasının qəbuledilməz olduğu bildirilib.

Ölkəmizin bu fəlakətlə bağlı Rusiya tərəfindən tam və şəffaf araşdırma aparılmasını, təqsirkarların müəyyənləşdirilərək, məsuliyyətə cəlb olunmasını, zərərçəkənlərə kompensasiya ödənilməsini gözlədiyi, bu addımların ikitərəfli münasibətlərdəki mənfi əhval-ruhiyyənin aradan qaldırılması üçün böyük əhəmiyyət kəsb etdiyi vurğulanıb", - XİN-dən bildirilib.