Azərbaycan və Qazaxıstan arasında Hökumətlərarası Komissiyanın iclası keçirilib

Bakıda Azərbaycan və Qazaxıstan arasında ticarət-iqtisadi əməkdaşlıq üzrə Birgə Hökumətlərarası Komissiyanın 21-ci İclası keçirilib.

Day.Az Trend-ə istinadən xəbər verir ki, Komissiyanın həmsədrləri Azərbaycanın Energetika naziri Pərviz Şahbazov və Qazaxıstanın Nəqliyyat naziri Nurlan Sauranbayevdir.

Tədbirdə çıxış edən Azərbaycan Energetika naziri Pərviz Şahbazov bildirib ki, 2024-cü ildə Azərbaycan və Qazaxıstan arasında qarşılıqlı ticarət həcmi 50 faiz artaraq 470 milyon ABŞ dollarına çatıb.

"2025-ci ilin birinci yarısında da ticarət dövriyyəsinin artım dinamikası davam edib - həcmi 501 milyon ABŞ dolları təşkil edib ki, bu da ötən ilin müvafiq dövrü ilə müqayisədə 4,2 dəfə çoxdur.

Azərbaycan və Qazaxıstan - ortaq tarix, mədəniyyət və gələcəyə dair strateji baxış birliyi ilə birləşən qardaş və müttəfiq dövlətlərdir. Prezident İlham Əliyev və Prezident Kasım-Jomart Tokayevin siyasi iradəsi və müdrik rəhbərliyi sayəsində əməkdaşlığımız bütün istiqamətlərdə yüksələn inkişaf nümayiş etdirir", - deyə nazir qeyd edib.

Bundan əlavə, onun sözlərinə görə, Bakı-Tbilisi-Ceyhan vasitəsilə Azərbaycan və Qazaxıstan arasında neft tranzitinin həcmi artacaq.

"Energetika sahəsində SOCAR və KazMunayGas arasında Qazax neftinin Azərbaycan üzərindən tranziti uğurla inkişaf edir. 2023-cü ildən indiyə qədər Bakı-Tbilisi-Ceyhan (BTC) neft kəməri vasitəsilə dünya bazarına 3,4 milyon ton Qazax nefti nəql olunub", - deyə o bildirib.

Nazir qeyd edib ki, tərəflər 2027-ci ilə qədər ildə 7 milyon ton həcmində tədarükün artırılmasını nəzərdən keçirirlər ki, bu da energetika tərəfdaşlığının möhkəmləndirilməsi və Qazaxıstanın ixrac marşrutlarının diversifikasiyası üçün vacib addım olacaq.

P.Şahbazov vurğulayıb ki, Azərbaycan və Qazaxıstan qarşılıqlı faydalı əməkdaşlığı davam etdirməyi, neftin daşınması həcminin stabilliyi və energetika sahəsində birgə infrastrukturun inkişafını təmin etməyi planlaşdırırlar.

Qeyd edək ki, Azərbaycan və Qazaxıstan arasında ticarət-iqtisadi əməkdaşlıq üzrə Hökumətlərarası Komissiyanın 20-ci iclası ötən il Astanada baş tutmuşdu.