Xırdalana yeni yollar çəkiləcək

M-4 Bakı−Şamaxı−Yevlax avtomobil yolunu Xırdalan şəhərinin mərkəzi ilə birləşdirmək üçün müxtəlifsəviyyəli yol ötürücüsü tikiləcək.

Day.Az xəbər verir ki, bu barədə Prezident İlham Əliyevin təsdiq etdiyi "Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025-2030-cu illər üçün Dövlət Proqramı"nda deyilir.

Dövlət Proqramına əsasən, 2025−2030-cu illər ərzində yol qovşağı tikiləcək və istismara veriləcək.

Bundan əlavə, Xırdalan şəhərinin M-1 Bakı-Quba Rusiya Federasiyası ilə dövlət sərhədi və M-4 Bakı−Şamaxı−Yevlax avtomobil yolları ilə əlaqələndirməsini təmin etmək məqsədilə avtomobil yolları şəbəkəsi təkmilləşdiriləcək. Bu istiqamətdə işlər 2025−2026-cı illər ərzində tamamlanacaq.

Eyni zamanda, M-4 Bakı-Şamaxı−Yevlax avtomobil yolunu M-1 Bakı-Quba-Rusiya Federasiyası ilə dövlət sərhədi avtomobil yolunun 16-cı kilometri ("VAZ dairəsi") ilə Xırdalan şəhərinin Həsən Əliyev küçəsi vasitəsilə əlaqələndirmək üçün yol ötürücüsü tikilərək istismara veriləcək. Bu, 2025-2030-cu illərdə həyata keçiriləcək.