Bakıda avtomobil piyadanı vuraraq öldürdü

Bakının Xətai rayonu, Məhəmməd Hadi küçəsi, 76 ünvanında ölümlə nəticələnən yol-nəqliyyat hadisəsi baş verib.

Day.Az xəbər verir ki, hadisə dünən axşam saatlarında baş verib.

Görüntülərdən aydın olur ki, 3 nəfər yolu keçməyə çalışır. Sürətlə hərəkət edən avtomobili görən iki piyada dayanır. Üçüncü piyada isə qaçaraq yolu keçməyə çalışır və bu zaman avtomobillə vurulur. O, hadisə yerində həyatını itirir.

Məsələ ilə bağlı  DİN-dən "Xəzər Xəbər"ə bildirilib ki, martın 31-i saat 23 radələrində Xətai rayonu ərazisində paytaxt sakini olan 45 yaşlı qadın piyada naməlum avtomobillə vurulub. Piyada aldığı xəsarətlərdən hadisə yerində ölüb. Polis əməkdaşları tərəfindən həyata keçirilən tədbirlərlə hadisəni törətmiş Bakı şəhər sakini 31 yaşlı Şamxal Şirinov idarə etdiyi avtomobillə birgə saxlanılıb. Qəza ilə bağlı Xətai Rayon Polis İdarəsində Cinayət İşi başlanılıb, araşdırma aparılır. Sürücünün həmin vaxt sərxoş olub-olmaması da araşdırılır.

TƏBİB- ə göndərdiyimiz sorğuya isə cavab olaraq bildirildi ki, Respublika Təcili və Təxirəsalınmaz Tibbi Yardım Mərkəzinə Xətai rayonu ərazisindən axşam saat 22:50-də piyadavurma səbəbilə çağırış daxil olub. Çağırış ünvanına təcili tibbi yardım briqadası cəlb olunub. Təcili tibbi yardım briqadası tərəfindən 45 yaşlı şəxsin həkiməqədər ölüm faktı qeydə alınıb.

Xezerxeber.az mövzu ilə bağlı daha ətraflı videomaterialı təqdim edir.