Emma Ələkbərzadə: "Ana olacağım düzgün deyil" - MÜSAHİBƏ

Day.Az представляет новость на азербайджанском языке.

Müğənni Emma Ələkbərzadənin Milli.Az-a müsahibəsi.

- Emma Ələkbərzadə artıq neçə ildir ki sənətdədir?

- Artıq on iki ildir ki, bu sənətdəyəm.

- İllərdir bu sənətdəsiz amma solo konsert etməmisiz? Nədir sizə mane olan?

- Solo konsert özüm istəməmişəm verim və hələ ki, istəmirəm. Mənə heç nə və heç kim mane ola bilməz, çünki Allah hər zaman başımın üstündədir.

- Sevda Ələkbərzadədən böyük olsanız da, bu sənətə Sevda xanımdan sonra gəlmisiz? Bəs o zamanlar nə ilə məşğul olurdunuz?

- O zaman mən İsrail səfirliyində yerləşən İsrail Mədəniyyət Mərkəzində çalışırdım, bilməyənlər üçün deyirəm ki, mən qiyabi olaraq Yerusalim (Qüds) Universitetini bitirmişəm, qiyabi olaraq Tarix fakültəsi və o mərkəzdə musiqi fəaliyyətimi də davam edirdim. Heç zaman müğənni olmaq istəməmişəm. Mənim birinci sənətim caz pianoçu bəstəkarlığıdır və hər zaman demişəm ki, müğənnilik mənim üçün bir hobbidir.

- Emma Ələkbərzadənin kilo verməsinin sirrini hələ də bilməyənlər var, necə oldu ki, bu qədər arıqladız?

- Sadəcə olaraq, həkim məsləhəti ilə ağzıma ağ qızıldan qıfıl vurub pəhriz saxladım (gülür).

- Nəyə görə gec-gec yeni mahnılar oxuyursuz, yaxşı mahnı yoxdur, yoxsa Emma xanım tez-tez yeni mahnılar ifa edən müğənnilərdən deyil?

- Tez-tez ağzıma gələni oxumaqdansa, gec-gec yeni mahnılar oxumağı üstün tuturam, amma sevənlərimin şikayəti yoxdur, hər zaman meni sevirlər, hörmət edirlər və gözləyirlər.

- Müğənni olaraq sizi daha çox sevirlər, yoxsa Sevda xanımı?

- Zövqlər müxtəlifdir, çünki hər ifaçının öz dinləyicisi var.

- Bu yaxınlarda ailə qurmusuz. Emma Ələkbərzadə necə bir həyat yoldaşıdır?

- Ümumiyyətcə, mən çoooox gözəl həyat yoldaşıyam (gülür).

- Həyat yoldaşınız Emil bəy sizi müğənni kimi dəstəkləyir?

- Emil hər zaman məni dəstəkləyir və müğənni kimi məni çox bəyənir.

- Həmkarlarınızdan kimləri toya çağırdız, amma onlar toya gəlmədi?

- Toya hansı həmkarımı çağırdım hamısı da gəldi, sağ olsunlar. Toyum da tam istədiyim kimi keçdi.

- Qalmaqallardan siz uzaq qaçırsız, yoxsa sizinlə qalmaqal etmək istəmirlər?

- Mənim tərbiyəm, səviyyəm və soyadım heç vaxt imkan verməz ki, mən qalmaqala baş qoşum. Neçə dəfə istəyiblər, amma alınmayıb.

- Sevda Ələkbərzadənin hansı mahnısını oxumaq istərdiniz?

- Sevdanın "Getmə gəl" mahnısını ifa edərdim. Çox bəyənirəm o mahnını.

- Bir ara ana olacağınız xəbəri yayıldı, bu, şayə idi, yoxsa?

- Yalan söhbətdir, ana olacağım düzgün deyil. İnşallah, Allah nə zaman nəsib etsə, o zaman da ana olacam.

- Emma xanımı sevənləri yaxın zamanda nələr gözləyir?

- Planlarım haqqında əvvəlcədən xoşlamıram danışmağı, qoy sürpriz olaraq qalsın.