Hindistanın Bakıdakı Səfirliyi telekommunikasiya sektoru üzrə virtual işgüzar görüş təşkil edib

Hindistanın Bakıdakı Səfirliyi Telekommunikasiya Avadanlıqları və Xidmətləri İxracının Təşviqi Şurası (TEPC) ilə birlikdə 21 sentyabr 2021-ci il tarixində Telekommunikasiya Sektoru ilə bağlı vebinar və virtual B2B görüşü təşkil edib.

Səfirlikdən Day.Az-a bildirilib ki, Hindistanın müstəqilliyinin 75 illiyini qeyd etmək üçün "Azadi Ka Amrit Mahotsav" adı altında keçirilən tədbirlər çərçivəsində baş tutmuş görüşə Hindistan və Azərbaycanın böyük telekommunikasiya şirkətləri, TEPC nümayəndələri və Səfirlik rəsmiləri də daxil olmaqla 40-dan çox iştirakçı qatılıb.

Tədbirin məqsədi telekommunikasiya sektorunda iki ölkənin maraqlı tərəfləri arasında işgüzar əlaqələri asanlaşdırmaq olub. Telekommunikasiya avadanlıqları və xidmətlərinin ixracını təşviq etmək və inkişaf etdirmək üçün Hindistan Hökuməti tərəfindən Telekommunikasiya Avadanlıqları və Xidmətləri İxracının Təşviqi Şurası (TEPC) yaradılıb.

TEPC sədri cənab Sandip Aqqarval tədbirdə açılış nitqi ilə çıxış edib. Tədbirdə çıxış edən Hindistanın Azərbaycandakı Səfiri cənab Bavitlunq Vanlalvavna Hindistanın telekommunikasiya məhsullarının imkanlarını vurğulayıb və bu sahədə əməkdaşlıq üçün böyük potensialın olduğunu qeyd edib.

Tədbir zamanı Hindistanın 11 aparıcı telekommunikasiya məhsulları istehsalçısı öz təqdimatları ilə çıxış edib. Hər iki tərəfdən iştirakçılar bir-biri ilə ünsiyyət qurmaq üçün yaxşı fürsət əldə ediblər və Azərbaycanın yerli telekommunikasiya şirkətləri hindistanlı həmkarları ilə əməkdaşlıq etməkdə maraqlı olduqlarını nümayiş etdiriblər.

Hindistan ilə Azərbaycan arasında 2021-ci ilin yanvar-iyul aylarında ikitərəfli ticarət 439,9 milyon ABŞ dolları təşkil edib. Azərbaycanın Hindistana ixracı 352,7 milyon ABŞ dolları səviyyəsində qərarlaşıb. Bu dövrdə Azərbaycanın ümumi ixracatında Hindistanın payı 3,1% təşkil edib və beləliklə Hindistan Azərbaycanın ixracat siyahısında 8-ci yerdə qərarlaşıb. Azərbaycanın Hindistandan idxalı isə 2021-ci ilin yanvar-iyul aylarında ötən ilin eyni dövrü ilə müqayisədə 8,4% artaraq 87,2 milyon ABŞ dolları təşkil edib.