Ləman İmanova: "Axı mən niyə dünyaya bir az gec gəlmədim?" - FOTO

Day.Az представляет новость на азербайджанском языке.

Akademik Milli Dram Teatrının aktrisası Ləman İmanovanın Milli.Az-a müsahibəsi.

- Sənət sizi seçdi, yoxsa siz sənəti?

- Mənim heç vaxt aktrisa olmaq arzum olmayıb. Düzdür, məktəb vaxtı müəyyən tədbirlərdə, konsertlərdə, "KVN" komandasında iştirak etmişəm. Bəlkə də, aktrisalığa həvəsim o illərdən yaranıb. Məktəbi bitirəndən sonra Xarici Dillər Universitetinə qəbul olmaq istəyirdim. Lakin alınmadı. Həvəsdən düşdüm.

- Sonra nə oldu?

- Sonra sənədlərimi Dövlət Mədəniyyət və İncəsənət Universitetinə vermək qərarına gəldim. Teatr rejissorluğu fakülətsinə daxil oldum. Oranı bitirdikdən sonra Bakı Bələdiyyə Teatrına qəbul olundum. Bir müddət orada işlədikdən sonra Akademik Milli Dram Teatrına gəldim. 2005-ci ildən bu teatrda çalışıram.

- Bakı Bələdiyyə Teatrında ilk rolunuz hansı oldu?

- Teatra getdiyim ilk günün səhəri mənə baş rol həvalə olundu. Amaliya Pənahova mənə "Elektra" rolunu verdi.

- Maraqlıdır, bəs niyə ixtisasınız üzrə işləmədiniz, yəni rejissorluq etmədiniz?

- Bir az çətin gəldi mənə. Həm də rejissorluğun çox məsuliyyətli bir iş olduğunu nəzərə alaraq elə aktrisa kimi fəaliyyət göstərməyi üstün tutdum. Çünki tələbə vaxtı bir neçə tamaşada rol almışdım. Ona görə də məndə aktirsalığa meyl və istək artmışdı.

- Bəs aktrisa olmaq istəyinizi ailə üzvləriniz necə qarşıladı?

- Valideynlərim öz etirazını bildirdi. Lakin mən bu sənəti seçməkdə israrlı idim.Onları birtəhər razı salmağı bacardım (gülür)

- Hansı riski gözə almışdınız aktrisalığı seçərkən?

- İtirəcək bir şeyim yox idi. Gələcəkdə ailə qurmağın problemlərindən də qorxmurdum. Çünki Universitetə qəbul olunmamışdan qabaq mən artıq ailə qurub ayrılmışdım.

- Neçə yaşında ailə qumuşdunuz?

- 17 yaşım var idi.

- Bəs həyat yoldaşınızdan niyə ayrıldınız?

- O, məndən bir yaş böyük idi. Bir həyətdə qalırdıq. Bir-birimizi sevirdik, amma ola bilər ki, yaşımızın az olması və təcrübəsizliyimiz ailəmizin dağılmağına gətirib çıxartdı.

- İndi ailəlisiniz?

- Bəli, hal-hazırda ailəliyəm. Bir qızım var.

- Həyat yoldaşınızın sənətinizə münasibəti necədir?

- Mənə dəstək olsa da, hərdən qısqandığı məqamlar olur. Bu da təbiidir, çünki əgər sevgi varsa, deməli, qısqanclıq da olmalıdır.

- Sevginiz hələ də yaşayır?

- Bəli, sevgi olmasa, həyat olmaz.

- Kimin üçün yaşayırsınız?

- Qızım üçün yaşayıram. Amma teatra gəlmədiyim zamanlarda darıxdığımı gördüm və sənətimin nə qədər vurğunu olduğumu anladım.

- Səhnə ilə sizin aranızda nə var?

- Yalnız və yalnız sevgi var.

- Yadınızda qalan ən gözəl xatirə hansıdır?

- Yaxşı yadımdadır, bir dəfə " İkinci səs" tamaşasını oynayırdıq. Tamaşanın sonunda rəhmətlik Siyavuş Aslan ayağa qalxıb məni göstərdi və dedi ki, bu qız çox gözəl oynadı. Bu söz mənim üçün dünyalara dəyərdi.

- Açıq-saçıq səhnələrə münasibətiniz necədir?

- Mən o tipli rollar oynamaram, çünki kompleksim var.

- Ümumiyyətlə, sizə belə rollar təklif olunubmu?

- Bəli, səhv etmirəmsə, iki dəfə olunub, amma mən imtina etmişəm.

- Təbiətcə necə insansınız?

- Ünsiyyətciləm. Hamıya inanıram. Amma bir az tənbələm (gülür).

- Sizcə, siz hal-hazırda rejissorların hədəf nöqtəsindəsiniz?

- Deyərdim ki, elə də yox.

- Hansısa serialdan dəvət almısınız?

- "Bacanaqlar" serialında çəkilirdim. İndi isə "Bir aləm var" adlı serialdan dəvət almışam. Artıq bir neçə serialında çəkilmişəm.

- Gəlir yeriniz ancaq teatr və seriallardandır?

- Bəli...

- Bu, sizi qane edir?

- Nəzərə alsaq ki, mən qadınam və üstəlik də incəsənət adamıyam, xeyir etmir gülür (gülür).

- İndiyə qədər nəyin qədrini bilməmisiniz?

- Cavanlığımın.

- Çox səhvləriniz olub?

- Kifayət qədər olub.

- Tənha gecələrdə göz yaşlarınızı silməyə çox məcbur olmusunuz?

- Bəli, mən həmişə ağlamışam. Çox vaxt ağlamaq üçün Bulvara üz tuturdum.

- Ən çox nəyə ağlayırsınız?

- Mənə qarşı olan haqsızlıqlara...

- Axı mən niyə?.. Bu fikri necə tamamlayardınız?

- Axı mən niyə dünyaya bir az gec gəlmədim?..
 

Böyütmək üçün şəkillərə klikləyin.