XİN rəhbəri gürcüstanlı həmkarına Ermənistanın qonşularına qarşı davam edən iddialarından danışdı

Azərbaycan xarici işlər naziri Ceyhun Bayramov Gürcüstan xarici işlər naziri Maka Botçorişvili ilə görüşüb.

Day.Az xəbər verir ki, bu barədə Azərbaycan XİN-in "X" hesabında məlumat verilib.

Məlumata görə, nazirlər iki ölkə arasında əməkdaşlığın siyasi, iqtisadi-ticarət və enerji aspektləri və perspektivlərini müzakirə etmək üçün görüş keçirib.

Qeyd olunub ki, tərəflər ikitərəfli münasibətlərin qarşılıqlı hörmət və dəstəyə əsaslanan strateji tərəfdaşlıq səviyyəsinə yüksəlməsindən razı qaldıqlarını bildirib və iki ölkə arasında investisiyaların və ticarət dövriyyəsinin artırılmasının vacibliyini bir daha vurğulayıblar.

Görüşdə COP29 tədbirinin nəticələri ilə bağlı fikir mübadiləsi aparılıb, regional sülh və normallaşma səyləri, sülh prosesinə qarşı mövcud çağırışlar və təhdidlər, o cümlədən Ermənistanın qonşularına qarşı davam edən ərazi iddiaları barədə məlumat verilib.

Qeyd edək ki, görüş Maltada Avropada Təhlükəsizlik və Əməkdaşlıq Təşkilatının (ATƏT) Xarici İşlər Nazirləri Şurasının 31-ci iclası çərçivəsində baş tutub.