"Həmin gecə tankların insanların üzərindən necə keçdiyi hələ də gözümüzün önündədir"

Day.Az представляет новость на азербайджанском языке

Şəhidlərimizin xatirəsini yad etmək üçün ailəliklə Şəhidlər xiyabanına ziyarətə gəlmişik. Gənc nəslin bu faciə barədə məlumatlandırılması çox önəmlidir. Bu səbəbdən mütəmadi olaraq uşaqlarımızı Şəhidlər xiyabanına gətiririk.

Bu sözləri yanvarın 20-də Şəhidlər xiyabanını ziyarət edən Bakı sakini Aidə Tomuyeva AZƏRTAC-a müsahibəsində söyləyib.

O deyib: "Həmin dəhşətli günlərin ağrı-acısını hələ də unuda bilmirik. Dinc əhaliyə divan tutulması, kütləvi terror nəticəsində yüzlərlə günahsız insanın qətlə yetirilməsi sovet rejiminin cinayətkar mahiyyətini bütün dünyaya bir daha nümayiş etdirdi. Həmin gecə zirehli texnika və tankların dinc sakinlərin, təcili tibbi yardım maşınlarının üzərindən necə keçdiyi hələ də gözümüzün önündədir. Nəsillər dəyişəcək, lakin şəhidlərimizin xatirəsi ürəklərdə əbədi yaşayacaq. Onlar bizim azadlığımız, müstəqilliyimiz və firavan həyatımız uğrunda canlarını qurban veriblər. Həmin gecə şəhid olanlar Azərbaycanın tarixinə parlaq səhifə yazdılar. 20 Yanvar hadisələri xalqımızın qan yaddaşına həkk olunan azadlıq mübarizəsidir.

Digər xəbərləri Azərbaycan dilində xüsusi Facebook səhifəmizdə izləyə bilərsiniz.