Təcili tibbi yardıma yalandan zəng edənlərə BU CƏZALAR VERİLƏCƏK
Azərbaycan Respublikasının qanunvericiliyinə əsasən, polisə, təcili tibbi yardıma və ya digər ixtisaslaşdırılmış xidmətlərə bilə-bilə yalandan zəng etmək və ya çağırış etmək inzibati məsuliyyət yaradır.
Azərbaycan Respublikasının İnzibati Xətalar Məcəlləsinin 564-cü maddəsinə (Bilə-bilə yalandan ixtisaslaşdırılmış xidmətləri çağırma) əsasən, bu əməli törədən şəxslər 100 manat məbləğində inzibati cərimə edilir. Bu qayda həm 102 (Polis), həm də 103 (Təcili yardım) xidmətlərinə edilən əsassız və yalan zənglərə şamil olunur və qanun qarşısında bu xətanı törədərkən 16 yaşı tamam olmuş bütün fiziki şəxslər birbaşa məsuliyyət daşıyırlar.
Əgər edilən yalan zəng sadəcə əsassız çağırış həddini aşarsa və hər hansı bir cinayət hadisəsinin törədilməsi (məsələn: qətl, soyğunçuluq və ya terror aktı, bomba qoyulması) barədə bilərəkdən yalan məlumatı ehtiva edərsə, bu halda şəxs artıq inzibati deyil, birbaşa cinayət məsuliyyətinə cəlb olunur. Azərbaycan Respublikası Cinayət Məcəlləsinin 296-cı maddəsinə (Bilə-bilə yalan xəbərçilik etmə) əsasən, belə şəxsləri 1500 manatdan 3000 manatadək cərimə, 320 saatdan 400 saatadək ictimai işlər, 1 ildən 2 ilə dək islah işləri və ya 3 ilədək müddətə azadlıqdan məhrum etmə cəzası gözləyir.
Qeyd olunan hüquqi cəzalardan əlavə, bu cür yalan və əsassız çağırışlar cəmiyyət üçün ciddi təhlükə törədir. Təcili xidmət xətlərinin yalandan məşğul edilməsi, həqiqətən köməyə, tibbi yardıma və ya təhlükəsizlik xidmətinə ehtiyacı olan digər vətəndaşların həyatını riskə atır. Dövlət qurumları tərəfindən hər bir yalan zəng edən şəxsin şəxsiyyəti və yerləşdiyi ünvan müasir texnoloji vasitələrlə dərhal müəyyən edilir və həmin şəxslər barəsində dərhal qanunauyğun şəkildə sərt tədbirlər görülür.
Nəsimi Ələsgərli
Заметили ошибку в тексте? Выберите текст и сообщите нам, нажав Ctrl + Enter на клавиатуре
