Kartla ödəniş qəbul etməyənləri NƏ GÖZLƏYİR? - 4000 MANAT CƏRİMƏ
Azərbaycanda ticarət və xidmət obyektlərində POS-terminal vasitəsilə nağdsız (kartla) ödənişlərin qəbul edilməməsi qanunvericiliyin ciddi şəkildə pozulması sayılır və inzibati məsuliyyət yaradır.
Azərbaycan Respublikasının İstehlakçıların Hüquqlarının Müdafiəsi Haqqında Qanununun 17-ci maddəsinə əsasən, POS-terminalların quraşdırılması məcburi olan obyektlərdə istehlakçıya nağdsız ödəniş etmək imkanının yaradılması satıcının birbaşa vəzifəsidir. Dövlət Vergi Xidməti tərəfindən müəyyən edilmiş qaydalara görə, fəaliyyət növündən və dövriyyəsindən asılı olaraq POS-terminal quraşdırmaq öhdəliyi olan sahibkarların müştəriyə "kartla ödəniş keçmir" və ya "yalnız nağd qəbul edirik" deməsi hüquqi qaydaların pozulmasıdır.
Bu qaydaya əməl etməyən sahibkarlar üçün Azərbaycan Respublikasının İnzibati Xətalar Məcəlləsinin 438-ci maddəsinə uyğun olaraq konkret pul cərimələri nəzərdə tutulur. POS-terminalın quraşdırılmaması və ya quraşdırılmasına baxmayaraq nağdsız ödənişlərin qəbulundan imtina edilməsi faktı aşkarlandıqda, təqsirkar şəxslər fiziki şəxslər üçün 600 manatdan 800 manatadək, vəzifəli şəxslər üçün 1500 manatdan 2000 manatadək məbləğdə cərimə edilir. Əgər bu xəta hüquqi şəxslər tərəfindən törədilərsə, cərimənin məbləği 3000 manatdan 4000 manatadək müəyyən olunur və Vergi Məcəlləsinə əsasən təqvim ili ərzində belə halların təkrarlanması maliyyə sanksiyalarının daha da artmasına səbəb ola bilər.
Nəsimi Ələsgərli
Заметили ошибку в тексте? Выберите текст и сообщите нам, нажав Ctrl + Enter на клавиатуре
